Нина (8) киднапирана на пат кон училиште, држена во заробеништво 149 дена: Пронајдена е жива, но нејзиното исчезнување е сè уште мистерија

Девојчето Нина фон Галвиц било киднапирано кога имало 8 години, било држено во заробеништво 149 дена и иако било пронајдено живо, нејзиното исчезнување е сè уште мистерија.

Еден од најшокантните случаи на киднапирање во Германија останува нерешен до ден-денес. Малата Нина фон Галвиц, ќерка на банкарски службеник и уметник, исчезна на пат кон училиште на 18 декември 1981 година во Келн. Таа помина речиси пет месеци во заробеништво, а нејзиното киднапирање останува обвиткано во мистерија.

Тоа декемвриско утро, осумгодишната Нина отишла на училиште со пријатели од соседството, но во еден момент заостанувала и никогаш не стигнала до училницата. Кога наставниците откриле дека ја нема, ги известиле родителите, кои пак ја известиле полицијата.

Еден час подоцна, семејството добило морничав повик. Од снимката се слушнал машки глас, а потоа и гласот на самата Нина, за да потврди дека девојчето е живо. Киднапирањето било невообичаено од самиот почеток, наместо веднаш да побара откуп, човекот ги прашал родителите: „Колку ја вреднувате вашата ќерка?“

Таткото морал да ја објави сумата преку радио и однапред договорена фреквенција. Киднаперот ја прифатил сумата од 800 илјади германски марки и дал инструкции. Планот бил таткото да го фрли пакетот со пари од возот во движење на 24 декември, кога ќе го прими сигналот. Но, немало сигнал. Полицијата ги купила сите билети однапред и криминалецот очигледно сфатил дека му е поставена стапица.

Неуспешни преговори со киднаперите

Вториот обид следел на 30 декември, овој пат таткото морал да заобиколува поле во близина на германскиот град Келн со хеликоптер и да чека сигнал. Наместо тоа, киднаперите го обвиниле дека соработувал со полицијата и ја прекинале комуникацијата.

Дури три недели подоцна пристигнала нова порака и видео од веселата Нина, но сега сумата се искачила на 1,2 милиони марки. Уште еден лет со хеликоптер на 5 февруари 1982 година завршил како и претходниот - без сигнал.

Очајните родители потоа решиле да ја прекинат соработката со полицијата. Телевизискиот новинар Франц Тартароти им дошол на помош, нудејќи им да дејствува како посредник.

Враќање по пет месеци

Во ноќта на 12 мај, Тартароти фрлил пакет што содржел милион и пол марки од возот. Три дена подоцна се случило чудо. Ја пронашле Нина на автобуската станица. Таа била жива, малку послаба, исплашена, но во добра состојба.

Девојчето рекло дека пет месеци живеела во соба во стара куќа со заковани прозорци. Маж и жена се грижеле за неа, ја хранеле, ѝ носеле книги и си играле со неа, но никогаш не ја извеле надвор.

Полицијата никогаш не успеала да открие кои се киднаперите. Според една од теориите, тие имале помошник во полициските редови кој ги предупредувал за потезите на властите.

Бизарен детаљ е што парите за откуп речиси никогаш не биле искористени. Серискиот број на секоја банкнота бил запишан, а полицијата само чекала некој да ја искористи. Само дел од 400 илјади марки бил пронајден случајно во шумата кон крајот на 1982 година. Останатите биле или закопани или изгубени засекогаш. Кога Германија преминувала на нова валута, а на граѓаните им било наредено да ги заменат своите марки за евра во банките, дури ни тогаш не се појавила ниту една обележана банкнота. Дури и по воведувањето на еврото во 2002 година, ниту една од обележаните банкноти не била искористена.

Нина набрзо се вратила на своите училишни обврски и продолжила да води нормален живот. Не ѝ била потребна помош од психолог бидејќи, како што самата тврдела, киднаперите се грижеле исклучително добро за неа. Но, самото киднапирање останало голема мистерија. Кој всушност го киднапирал девојчето и зошто на крајот се откажале од огромна сума пари, останува мистерија до ден-денес.