13-годишен син ѝ купил автомобил на самохраната мајка: Заработувал пари косејќи им ги дворовите на соседите

Вилијам Престон, 13, од Невада поминал долго време штедејќи пари за да ѝ купи автомобил на својата самохрана мајка и да ѝ помогне кога мислела дека работите не можат да бидат полоши...

Вилијам живее со својата самохрана мајка, брат и сестра, и како што пишува NBC, неговата мајка се мачела затоа што немала автомобил. Затоа, момчето решило да направи нешто во врска со тоа.

Кога не бил на училиште или не пишувал домашни задачи, ова преслатко момче заработувало неколку дополнителни пари косејќи ги дворовите на соседите. Заштедил пари, а до оваа одлична идеја дошол кога видел на YouTube како некои други деца, многу постари од него, ги изненадуваат своите родители купувајќи им автомобил.

На почетокот мислел дека нема да успее во својата намера, а потоа еден ден на огласите нашол бел Шевролет Метро, ​​кој не бил многу скап. Сепак, сè уште му недостигале пари.

Колку силно сакал да ја изненади мајка си покажува следниот потег што го направил - ѝ го понудил на сопственичката на автомобилот својот Xbox како замена.

„Автомобилот беше навистина евтин и ја прашав сопственичката дали можам да го понудам мојот Xbox, или дали можам да направам нешто за да го вклучи во цената. Таа на почетокот одби, но потоа се предомисли и се согласи“, им рекол Вилијам на новинарите.

Откако разговарал со сопственикот на автомобилот, тој ѝ ја соопштил добрата вест на мајка си. Таа не му верувала, па отишла кај жената што го продавала автомобилот и се убедила во неговата приказна.

„Тој беше уморен од тоа да ме гледа како плачам постојано. Во тешки времиња за мене, мојот син се вмешал. Секој поминува низ тешки времиња во животот, но секогаш може да се случи нешто добро во секоја ситуација, сè додека се бориш“, изјавила мајката на Вилијам, Кристал Престон, за „NBC-2“ и додала:

„Бев изгубена, врескав од среќа. Колку тринаесетгодишници познавате кои ѝ купуваат автомобил на мајка си? Не познавам ниту еден, ниту пак сум слушнала за таков случај. Не можам да ги опишам чувствата. Нема зборови да објаснам колку сум горда.“