Дружењето со пријатели не е губење време – тоа е најдобрата терапија за тинејџери!

Тинејџерските години се време кога пријателите стануваат речиси поважни од сè друго. Тие се нашето огледало, поддршка и бегство од притисоците на училиштето, семејството и секојдневието. Но, се поставува прашањето – колку често е добро да се излегува со друштвото, а да не се претера?

Психолозите велат дека редовното дружење е неопходно за менталното здравје на младите, но клучот е во балансот. Идеално е тинејџерите да поминуваат 2 до 3 вечери неделно со пријателите, а остатокот од времето да го посветат на учење, хоби, спорт или семејство.

Кога тинејџерите премногу излегуваат, често се јавува замор, пад на концентрација и отпор кон одговорности, но кога се премногу повлечени – може да почувствуваат осаменост и изолација. Дружењето не мора секогаш да значи журка или излегување во град. Понекогаш е доволно кафе, прошетка, филмска вечер или заедничко учење – важно е контактот да постои.

Истражувањата покажуваат дека младите кои редовно се дружат имаат поголема самодоверба, подобри комуникациски вештини и помал ризик од анксиозност и депресија. Пријателствата во тие години се вид на „емоционален тренинг“ – преку нив учиме како да бидеме искрени, како да поставуваме граници и како да се поддржуваме.

Затоа, излегувањето со пријателите не е губење време – тоа е вложување во себе. Сè додека не ја заборавате рамнотежата меѓу обврските и дружењето, секое кафе, разговор или смеење вреди повеќе отколку што мислите.

Freepik